مدونة تاسكتي مواضيع مفيدة لنظافة وصيانة المنزل
مقالات مشابهة
من احلى العناصر اللي بتضفي روح وجمال على ديكور المكان ومن اكتر الهدايا اللي بتفرح اي ست هي بوكيه الورد, بعد ما نفرح بجماله واسلوب تقديمه ودخلته علينا بنبتدي ننقله في فازة عشان نقدر نستمتع بمنظره لأطول وقت ممكن وعشان نحافظ علي الورد فريش اكبر مدة قبل ما يدبل هنعمل النصايح دي:
- اولا مية الفازة ارتفاعها بكون في حدود 10 سم مننساش ان الساق اصلا ربنا خلقها متتعرض للميه بخلاف الجذور
- بنغير الميه يوميا للفازة ويفضل اننا نستخدم ميه الحنفية بعد ما يعدي عليها يوم لأنها اول ما بتنزل بتكون نسبة الكلور عالية فيها وبيكون شديد على الزرع.
- ممكن نقص جزء من اسفل ساق الزهرة يوميا بزاوية ميل ويفضل نقطعه بكتر عشان نساعد الساق تمتص قدر أكبر من الميه
- بنتخلص يوميا من الورق الدبلان بقطعه لأنه بيسحب جزء من غذاء الزهرة بالاضافة لمظهره الغير محبب
- في ناس بتنصح اننا نحط في الميه قرص اسبرين او معلقة سكر سغيرة في الميه لتغذية الزهرة ولرفع مقاومتها وفي ناس بتنصح بالعكس, انا الحقيقة ملقتش مرجع متخصص بيتكلم في الموضوع ده بس بالتجربة بحس انها بتفرق للأحسن في بعض انواع الزهور.
- الورد البلدي تحديدا بنقصر الساق له عشان متكونش حمل على الزهرة في سحب الميه, هو غالبا بنشتريه بيكون ساقه اقصر من باقي الانواع.
- في بعض انواع الورد المستورد بتصبغ بصبغات كيماوية لتلوينها يفضل وضعها في فازة لوحدها عشان باقي الزهور متتأثرش بالصبغات دي وتدبل
- مننساش واحنا بنرص الورد اننا نسقه بحيث يليق مع المكان غالبا الالوان السخنة القوية بتكون احلى في غرف المعيشة والسفرة, انما الالوان الهادئة الرقيقة بتكون اجمل في غرف النوم
في النهاية بننبهكم للحدث الاجمل في مصر اللي بيتكرر كل سنة مع دخول الربيع, اطول مدة معرض في مصر بيمتد من اوائل مارس لغاية مايو معرض زهور الربيع بحديقة الاورمان في الجيزة, روحوا وقضوا يوم ومتعوا عنيكم واغسلوا روحكم, شموا هواء نضيف في قلب القاهرة, اشتروا نعناع بلدي وروز ماري وزعتر وهاتوا شتلة ورد بلدي هدية للي تحبوه ولو عندكم جنينة حتى لو قصاد العمارة هاتوا شجرة فاكهة وازرعوها فيها وعلموا ولادكم رعايتها, هتلاقوا هناك كل مستلزمات الزراعة وعناصر اللاندسكيب غير الحيوانات الاليفة, متنسوش تستنونا المقال الجاي اللي حيكون عن موضوع مهم جدا انا لسه مش عارفه, سلام.
