مدونة تاسكتي مواضيع مفيدة لنظافة وصيانة المنزل
مقالات مشابهة
من وقت للتاني بنزهق من شكل وديكور البيت وبنحتاج نغيره عشان كده كتير من المصممين بيلجأوا لورق الحائط لأنه من اسهل الخامات اللي ممكن نعمل بيها شغل حلو في الديكور ونعالج بيه اخطاء في تصميم المكان من غير بهدلة للبيت ومن غير عطلة في الوقت. طيب نختار ورق الحائط ازاي؟ ايه التفاوت الرهيب الموجود في اسعار الورق في السوق ؟ مع انها كلها اشكال جميلة واشكال حلوة وكل واحد وذوقه. في شوية حاجات مهم ناخد بالنا منها واحنا بنشتري الورق:
اولا سمك الورق: طبعا اي حد مش متخصص حيبقى متخيل أن الورق كل لما يبقى تخين ومحمل كده يبقى احسن ممكن الكلام ده يبقى صح لو احنا حنلف في الورق لحمة مثلا لكن احنا حنلزقه على الجدار وطبعا كل ما الورق يرق ويبقى خفيف يلزق احسن ومتبانش اللحامات بتاعته فالتحدي قصاد الشركات انه يطلع خامة متينة وفي نفس الوقت خفيفة على اد ما يقدر وعشان كده سعر الورق بيتفاوت ما بين الانواع الصيني والكوري والاوربي نهاية بالامريكي
ثانيا شكل نقشة الورق: في عندنا نمطين من ورق الحائط, النمط الاول بيكون الورق ملوش نقشة وشكل خامة كأنه قماش مثلا او نغمشة او حبات رمل المهم انه شكل خامة منتظمة يبقى مفيش مشكلة مش محتاجين نراعي تقسيط او ترحيل للورق لأنه في الاخر حيدي Texture واحد حتى ممكن ناس تفتكرها دهانات بالمناسبة الورق ده بيهدر أقلمن النوع التاني.
النمط التاني : من الورق بيبقى له نقشة ولتكن رسم هندسي مثلا او ورد او … نخللي بالنا من مقاس النقشة الورق لأن احنا بنشوفه في المعرض عبارة عن عينة جوه الكتالوج + صورة لتركيبه في فراغ ديكوري جميل وده ممكن يخدع عين غير المتخصص فيشوف النقشة جميلة ومناسبة وهي مقياسها كبير على المكان اللي حتركب فيه في شقته بمعنى انها تكون متصورة في الكتالوج وهي راكبة في رسيبشن قصر واسع بارتفاع جدران عالي ونيجي نركبها في اوضة صغيرة وجدار ارتفاعه قليل فنلاقي شكلها كبير على الجدار وشكلها وحش عشان كده لازم نبقى متصورين شكل النقشة وهي راكبة عندنا مفيش مانع نخللي البياع يفرد لنا رول عشان نشوفها مفرودة بحجمها الحقيقي
ثالثا ترحيل النقشة: طبعا الورق لو فيه نقشة المفروض انها تجمع pattern ودي مشكلة ممكن تقابلنا في الورق بالذات في الانواع الرخيصة ان الرسمة متبقاش مجمعة بالظبط يعني لو بصيت من قريب تلاقيها مش مسلمة قصاد بعض في كذا نقطة مع انها قصاد بعض في نقط تانية او تلاقيها في نقطة اعلى وفي نقطة تانية اوطى. لو مرحلة في كل النقط يبقى عيب الصنايعي اللي بيلزق لو مش كده يبقى عيب الورق يعني طباعة الورق مش مظبوطة وده نتيجة لأن الورق بيمط بدرجات متفاوتة نتيجة لسمكه. يبقى النصيحة اننا لما نشتري انواع رخيصة نتجنب انها تكون اشكال محتاجة تجمع.
اخيرا : الورق خامة بتهدر يعني لازم يفيض منه هدر ممكن نستفيد منه اننا نركبه في بانوهات اونجمع قصاقيصه وتركب عشوائي Patch work في جنب او عمود مع مراعاة تناسق الالوان او اننا نجلد بيها كتب الولاد J او ارموا الهدر وخلاص وبلاش وجع دماغ!
