الرئيسية / الإضاءة / كيف توزع الاضاءة لإظهار جمال المكان الجزء التانى

كيف توزع الاضاءة لإظهار جمال المكان الجزء التانى

 

حساب عناصر الإضاءة : بعد ما وزعنا عناصر الإضاءة مبدئيا في المقال السابق تبعا لنقاط التركيز محتاجين نحدد بشكل أدق عدد وقوة عناصر الإضاءة سواء كانت لمبات او سبوتات, في حسبة بسيطة ممكن نعملها لحساب كام وات للغرفة طول الغرفة *عرضها*1.5 =عدد الوات المطلوب بشرط ان الاضاءة دي تكون مركزية والحوائط فاتحة.

الفراغات المختلفة : طبعا حسبة الإضاءة السابقة دي حاجة سريعة وسهلة انما الاضاءة بتتحسب من خلال معادلات تانية مكانها مش مقال لغير المتخصصين. بس عموما الإضاءة بيختلف احتياجنا لقوتها حسب المكان وطبيعة استخدامه وحسب حالتنا المزاجية مثلا الحمام والمطبخ لازم تبقى اضائتهم عالية, غرفة المعيشة لازم يتوفر فيها بديلين إضاءة قوية للنشاط والحركة وإضاءة خافتة للاسترخاء, غرفة النوم إضاءة هادية مع امكانية التركيز في نقط للقراءة او التسريحة مثلا.

الألوان : الوان الجدران والاثاث تختلف في قدرتها على عكس الضوء, الألوان الفاتحة تعكس ضوء اكتر من الألوان الغامقة بالتالي لو عندنا جدار غامق مختلف من ورق حائط او خامة او بايوه خشب واويما ونحاس يبقى احنا محتاجين اضاءة زيادة عليه عشان نبين جماله.

الإضاءة المساعدة : طيب ده بالنسبة للإضاءة المركزية بالنسبة لباقي الإضاءة زي السبوتات والاباليك رأيي الشخصي انها تكون اضعف من المركزية لتفادي الابهار وسخونة الجو وسحب الكهرباء ولإضفاء اجواء رومانسية و و و بلاش شغل كهارب فرح العمدة ده !! عموما النصيحة اننا نقسم الإضاءة على اكثر من مفتاح عشان تقدر تقلل او تزود الضوء حسب احتياجك وراحتك.

اختيار نوع اللمبة : زي ما قلنا اللمبات الموفرة بقيت هدف للتوفير في فواتير الكهرباء بس ناخد بالنا نختار انواع عليها ضمان وتكون سهلة الصيانة ومتوفرة في اي وقت, في نوع من السبوتات بيكون قطعة واحدة اللمبة والشاسيه والترانس ووش السبوت قطعة واحدة ده بيكون ارخص عادة بس لو باظ بتضطر ترميه كله بخلاف النوع اللي ممكن نفك اللمبة بس ونغيرها, كمان النوع الاول عملية فكه لو كان متثبت في سقف معلق وارد يحصل كسر في الجبس ويبقى عندنا مشكلة جديدة لاصلاحه, اللمبة المعروفة تجاريا بالدقرمة في ابحاث بتقول انها بتسبب سرطان الجلد في ابعاد اقل من 3 م وده معناه انه ممنوع نستخدمها جوه الشقة.

اخيرا الإضاءة جزء من معادلة المكان عشان تقوم بدورها لازم الالوان والطراز والفرش يساعدوها واهم جزء في المعادلة هو ذوقك اختار اللي تحبه ويعجبك وميهمكش من كلام مهندسين الديكور ولو لقيت النتيجة مش عاجباك ابقى غيرها الدنيا مش حتطير Enjoy

شاهد أيضاً

تاسيس الكهرباء

كيفية تأسيس كهرباء شقة

الصدمات الكهربائية هي  واحدة من الأخطار المرتبطة بتأسيس الكهرباء في المنزل او المصنع او الشركة …

اترك تعليقاً