مدونة تاسكتي مواضيع مفيدة لنظافة وصيانة المنزل
مقالات مشابهة
ازاي نختار الوان الدهانات؟ ازاي تطلع النتيجة زي ما احنا عاوزين ؟ نستخدم اي خامات او براندات في الدهانات؟ الاسئلة دي كلها بتدور في بال اي حد عاوز يدهن شقته وتطلع جميلة وفخور بيها
نختار ازاي الالوان: ناس كتير بتلجأ للبحث على الانترنت على صور ديكور واللي يعجبها تحفظه وبعدين تفرجه للاسطى النقاش او المهندس المسئول عن الشغل حتى ممكن تبعته له على التلفون مثلا كنوع من توثيق الشغل وبعدين تفاجأ أن اللون مطلعش زي ما هي عاوزة.
لازم ناخد بالنا من شوية حاجات أولا: شاشات الكمبيوتر المختلفة مش بتطلع درجات الالوان زي بعض وكذلك شاشات التلفونات والأهم من كده عين البني ادم مش كل الناس بتشوف درجة اللون الواحدة بنفس الطريقة ازاي؟ احنا طبعا كلنا عارفين معلومة ان في ناس عندها عمى الوان وده بيكون في الوان معينة, انما اللي مش كل الناس تعرفه ان عمى الالوان درجات يعني في ناس موجود عندها تونات اقل من غيرها على فكره الستات مش بيجيلها عمى الوان وغالبا بيشوفوا درجات اكتر من الرجالة وعشان كده بيقدروا يفرقوا بين اللون السمني والسكري والايفواري والبرجامون بينما الرجالة بيشوفوها كلها بيج وعشان كده بيبقى حمل على النقاش انه يواصف واحدة ست في الالوان وبيبقى عاوز يعتمد الشغل من جوزها لأنه اكيد هيريحه عنها, او يشترط ان العميل يختار اللون من كارتلة الوان برقم وبالتالي يشتري الكمية كلها كمبيوتر وساعتها يبقى اختيار العميل بدقة الكمبيوتر وميقدرش يفتح بقه مع النقاش ويقله انت مطلعتش اللون اللي انا عاوزه مع انه مش هو دي درجة اللون اللي كان عاوزها !!!
طب ليه ايه اللي حصل !! اللي حصل ان لون العينة لما بنختاره من الكارتلة ويعجبنا غالبا لما بنفرده على مساحة اكبر بنحس انه اغمق وبالتالي لو عاوز تنقي علطول وتنفذ –الكلام لغير المتخصص- يبقى درجة اللون اللي تعجبك اشتري افتح منها درجتين بس نخللي بالنا درجة اللون اللي بندهنها بيأثر عليها الالوان المحيطة وانعكاسها عليها من الفرش والستائر وطبعا طبعا إضاءة المكان عشان كده ممكن ننقي درجة لون على برامج الكمبيوتر بتاعت شركات الدهانات لغرفة وبعدين نلاقي النتيجة مختلفة عندنا لأن الإضاءة مختلفة سواء الطبيعية او الصناعية عشان كده الطريقة الوحيدة لضمان درجة اللون اننا نعمل عينات على الجدار كذا درجة الصبح والافضل لو النقاش يسيبنا يوم يعني منقيش في ساعتها ونراقب درجات الالوان على مدار اليوم وتأثير الإضاءة الطبيعية عليها عشان نقدر نوصل لأحلى درجة لون تشوفها عنينا
