مدونة تاسكتي مواضيع مفيدة لنظافة وصيانة المنزل
مقالات مشابهة
شركات كتير بقيت تنتج السيراميك الخشبي المط والحقيقة ان شكله بيكون جميل في العرض وبقى بيتعمل مقاسات تشبه مقاسات الخشب فبيطلع نتيجة تشبه الخشب تماما عشان كده ناس كتير بتفضل تركبه خصوصا في غرف النوم, وبنكون طمعانين طبعا انه يكون سهل النضافة باعتباره سيراميك إلا أن النتيجة مبتكونش دايما كده وبنلاقي ان السيراميك بيجير وشكله بقى وحش واحنا لسه مخلصناش تشطيب اساسا.الحقيقة لأن السيراميك مط وفيه عالي وواطي احيانا عشان يشبه الخشب الطبيعي فمواد البناء بتلزق فيه وعشان نتجنب التجيير ده لازم نعمل الآتي :
- نتجنب عمل سقية السيراميك بمونة لباني وممسحة زي ما احنا متعودين السقية تتعمل بالفرطاسة عشان المبلط يقدر يسقي بلاطة بلاطة على اد العراميس فقط –العراميس جمع عرموس وخط اللحام بين البلاطتين- واي مونة زيادة تطلع عن اللحام يتم تنظيفها فورا يعني يكون معاه حتة قماش بالاضافة للفرشة السلك.
- بعد الانتهاء من لزقه يتم تغطيته تماما بمشمع ولزق الاطراف بسوليتيب وإذا خفنا من قطع المشمع نزود كرتون عشان نحميه من باقي خطوات التشطيب لسه النقاشة حيتحركوا بسلم في الاوضة وممكن يقطعوا المشمع.
- المهم اننا نحميه من اي خامة زي المعجون او الدهانات او الاسمنت الابيض لأنها هتطلع عيننا في تنضيفها.
- بعد ده كله لو حصل أن السيراميك اتوسخ يبقى هنضطر نضفه وهنستعمل منظف من اللي فيه مواد حارقة زي ميه النار او الكلور طبعا بتبقى مخففة مع صابون سائل وسلك المواعين طبعا لازم نلبس جوانتي واحنا شغالين. ملحوظة استعمال منظفات المواد الحارقة سريع ومنجز ولا ينصح ب الا في الحالات دي لأنه بياكل الجليزنج بتاع السيراميك ومع الوقت حيبتدي يبقى زي الفخار.
- اخيرا لتلميع السيراميك الخشبي في الاستعمال هنتعامل معاه على انه خشب طبيعي ونستعمل السبراي بتاع الخشب.
لو سألتني عن رأيي في السيراميك الخشبي انا شخصيا مش بحبه واكيد الخشب احسن منه سواء كان صناعي HDF او خشب طبيعي بس طبعا السعر له حكم, بالنسبة لي حتى الفنيل مع ضعفه بالمقارنة بالسيراميك احسن من السيراميك الخشبي في نضافته وفي دفئه في اوضة النوم بس كل واحد ومزاجه بقى
